Gutisk ufkunjahaidus jah Gutiska razda

Swaswe filu izwaraize kunnun, Baineiamein P. Eiaunsaun (Benjamin P. Johnson) gaskop Gothic for Goths filma miþ niujaim waurdam Gutiskis ufkunjahaidaus gamanwjandaim Gutiskai razdai swaswe Tseiupakabra, þatei gaskeiriþ ist gaitssugja (airis mitoda warþ þatei i-waurts wesi, iþ himma daga kunnum þatei waurtawaurts ist, in Aggiliskai razdai "root word").


Waila ist du im, Gutam, aþþan þize waurde ufto ni brukjanda aiw fram mannam in ize sinteinaim gawaurdjam, unte brukeins Gutiskaizos razdos ana miþnatja ist filu gaura. Sweþauh her jah jainar bigitam mans þaiei brukjand razdos, iþ þata ist þatainei in fawaim riqizaim stadim ana miþnatja. Hvas mahtedi þata bi sunjai rodjan? Maþþaius Karbair (Matthew Carver) ufto, Friþureiks Swartagaizis (Fredrik Adevåg)? Nu ju magi saihvan mans þanzei sildaleikjand hva gameliþ ist her jah sokjand skeirjan þata, inuh mahteiga brukein in ize sinteinaim libainim, unte so razda ist dauþus razda inuh rodjandans miþ ganohamma fraþja þau ganohai usdaudein du laisjan jah brukjan. Alja Maþþaiau jah Friþureik ni galaubja du þamma, ei sijaina filu anþaraize þizeei mageina fraþjan þizai razdai. Nu, þata jah magi skapjan mahtins faur brukein. Sind du frisahtai Gutans (ni muna fairnja, iþ andwairþja haitanda Goths, in ize Gothic subculture), wileina ufto laisjan þo razda swe ize analaugna razda. Qino ju simle qaþ du mis, þatei sind Gutans þaiei wileina brukjan Gutiskaizos razdos swe ize analaugna razda.

Nu aftra qimam ana anastodeinai, þarei ik rodida bi þo waurda in Gothic for Goths. Sind goda biaukainos du razdai jah ufto, ainamma daga, sijaina mans þaiei brukjand þize, iþ und hina dag, ni hugja mais wairþai.

ufkunjahaidus = subculture
miþnati = internet

Liuþ - Guda liuhadis

Atsatja izwis himma daga, aiþþau batizo ist qiþan, þizai naht, unte sind twos hveilos jah sibun jah twai tigjus minutjus in midumai nahts her, liuþ þatei ik melja her, þatei haitan ist "Guda liuhadis".

O, Guda liuhadis
Sijuþ swe lukarn mele jah þeihse
Staurmandona, rignandona,
Raihtaba riurein reikinoþ

Slepandona, skalkinonda
Aiweinom mahtim mikilom
Wistrawind wagiþ wilduba
Hairto handuns haldiþ harduba

Airdogan jah Twrkia in ize wahstau

Airdogan aftra atlagnada in karkarai airuns jah nu sokns freihalsis munis in Twrkiai ist managizo þau airis. Bi sunjai wulþrais ist þatei in usmeta mans ataugjand ize fraþi anþaraim, iþ skeiriþ þata þatei gamotan nist du airinon bi allata hva wairþiþ in landa? þauhjabai faurþizei Airdogan reikinodedi jah harjis gaskop situatsjon ungaraihteins in allamma landa jah airum fraqistnanda waurþun fram im, aþþan nu ni magum qiþan þatei filu batizo ist, þata wiþrawairþo, wairsizo ist. Afar þatei Atatwrk tawida us Auttomaniskamma reikja andwairþ reiki þatei wilda wisan swaswe Fragkareiki jah Aggilaland, andwairþ reiki þatei ni libaiþ in fairnjaim melam, iþ þugkeiþ þatei galaubeins ist wulþrais du Airdogan, jah reiki wairþiþ mais jah mais islamisk miþ fralusta andwairþjaize wairþe. Hvan riurei godis reikjis þizei gaf freihal du baurgjam. Iþ, ni du allaim framgahts was, du qinom anabusns was þatei ni gamotan was du im hamon haubidawastja. Nu, in wistraaiwropai miþ izos andwairþjai ungalaubeinai fralaus so airþadails qinom miþ haubidawastja, þos hamodedun haubidawastja þanuh galaubeins Xristaus nauh þata managisto reikinoda libainim manne in Aiwropai, iþ þata inmaidida jah in Twrkiai jah austraaiwropai magum saihvan þatei nauh ni alla fralusun ize gairnein hamon haubidawastja. Ubil nist, iþ jabai gamotan þau ni gamotan ist hamon þaim, þata ist, uf witoda garedan ist, galaubeins blandada miþ reikinassau landis, jah hvan fairra gaggai? Airdogan þairhwisiþ stodjan galaubjandans baurgjans, aglo ist þatei ungalaubjandans baurgjans ni stodjanda jah þatei skapjiþ unibnassu. Jah unibnassus skapjiþ drobnans, jah drobna magi reiki du fralusta tiuhan. In þis hugja þatei batizo wesi Airdogan ei gibai mais freihals þaim ungalaubjandam. Aglo du imma ist, is waljands sind galaubjandans jah inuh ija, ni mag reikinon. Hvaiwa lausidedi? Mel þaurbum. Swa þiudawaldufni nist aiweina reikinassus ainis reikis, iþ waleins þiudos. Afar ganohamma mela, situatsjo wairþiþ ei niujis reiks waljada fram þiudai saei batizo reikinon mag. Jabai goþs reiks wairþai.